မျက်လုံးတစ်ဖက်နဲ့ စာရေးဆရာ

Spread the love

အခုတလော စာကိုစွဲစွဲမြဲမြဲမဖတ်ဖြစ်တာကြာချေပြီ သို့ပေမဲ့ စာဖတ်ဝါသနာအရင်းခံရှိသူမို့ ရန်ကုန် ရောက်တိုင်း ဈေးဝယ်စင်တာကြီးများရောက်သည့်နေ့များတွင် စာအုပ်အရောင်းဆိုင်ဝင်၍ ဖတ်ချင်သည့် ကောင်းနိုးရာရာစာအုပ်များကို ၀ယ်ယူစုဆောင်း ကိုယ့်အိမ်ပြန်ရောက်ချိန်တွင် အချိန်ရလျှင်ရသလို ဦးစားပေး စာရင်းအလိုက် နေရာပေးထားသည့်စာအုပ်များကို ကောက်၍ ဖတ်တတ်သည်။

          အနှီစာအုပ်များတွင် မြန်မာနိုင်ငံ၏ပြဿနာသောင်းခြောက်ထောင်ကို မိမိအမြင်ရှုထောင့်မှတင်ပြထား သည့် စာရေးဆရာတစ်ဦးရေးထားသည့် အတွေးအမြင်ဆောင်းပါးမျာစုစည်းထားသည့် စာအုပ်ကိုဖတ်မိသည်၊ စာရေးဆရာဖြစ်သည်နှင့်အညီ မြန်မာနိုင်ငံ၏ ပြဿနာအရပ်ရပ်ကို ကွက်ကွက်ကွင်းကွင်းနှင့် အမှန်တရားပြည် သူများမြင်အောင်ရေးသားချပြနိုင်သည်ကိုတွေ့ရသဖြင့် လေးစားအားကျမိသည် သို့ရာတွင် ဆောင်းပါးတစ်ပုဒ် အရောက် အထက်ပါလေးစားအားကျမှုများသည် သုညဒီဂရီအောက်လျောကျပျောက်ဆင်းခဲ့ရပါတော့သည်။

          ကယားပြည်နယ်တွင် ဗိုလ်ချုပ်အောင်ဆန်းကြေးရုပ်ဖယ်ရှားပေးရန် ပြီးခဲ့သည့် (၇၂)နှစ် ပြည်ထောင်စု နေ့ဆန္ဒပြမှုကို စာရေးဆရာက ကြော်မကောင်းကြားမကောင်းဖြစ်ရပ်အဖြစ် ရေးသည်၊ ဗိုလ်ချုပ်အောင်ဆန်းရုပ် တုကို မကြည်ဖြူနိုင်လောက်အောင် လူမျိုးစွဲ၊ ဒေသစွဲတွေကြီးနေသည်ဟု ဆန္ဒပြသူများကို စွပ်စွဲသည်၊ ဗိုလ်ချုပ် အောင်ဆန်းရုပ်တုမလိုချင်လျှင် ဗိုလ်သန်းရွှေနှင့် ဗိုလ်ခင်ညွှန့်အရုပ်တို့နှင့်အစားထိုးကြဟု စကားနာထိုးသည်၊ ဖက်ဒရယ်အခွင့်အရေးလိုချင်ခြင်း၊ ဖက်ဒရယ်စနစ်လိုချင်ခြင်း၊ ဖက်ဒရယ်ကတိတွေလိုချင်ခြင်းနှင့် ဗိုလ်ချုပ် အောင်ဆန်းလိုပုဂ္ဂိုလ်မျိုးကိုခါးခါးသီးသီးဖြစ်နေခြင်းက သတ်သတ်ဟုနှုတ်လှန်ထိုးသည်၊ ကယားပြည်နယ်ဖက် ဒရယ်အခွင့်အရေးမရအောင်ဗိုလ်ချုပ်အောင်ဆန်းကပိတ်ပင်ခဲ့တာမဟုတ် ၁၉၆၂ စစ်အာဏာသိမ်းဗိုလ်နေ၀င်း အစိုးရက ပိတ်ပင်ခဲ့တာ၊ ၁၉၇၄ အခြေခံဥပဒေကပိတ်ပင်ခဲ့တာ၊ ၈၈ အာဏာသိမ်းစစ်အာဏာရှင်စနစ်က ပိတ်ပင်ခဲ့တာ၊ ၂၀၀၈ အခြေခံဥပဒေစာအုပ်အစိမ်းကြီးက ပိတ်ပင်ခဲ့တာ ကန့်ကွက်ခြင်းကန့်ကွက် စစ်အာဏာရှင် တွေကိုတိုက်ရမယ်၊ စစ်အာဏာရှင်တွေကို ဆန့်ကျင်ရမယ်၊ ၂၀၀၈ ဖွဲ့ စည်းပုံအခြေခံဥပဒေကို ကန့်ကွက်ရမယ် ဟု ဘုမသိဘမသိအကြံပြုသည်။

          အဲဒါတွေကိုမြင်အောင်မကြည့်ဘဲ ဗိုလ်ချုပ်အောင်ဆန်းရုပ်တုလောက်သဲကြီးမဲကြီးကန့်ကွက်တိုက်ကွက် ဖော်နေတာကြတော့ အမှားကြီးမှားနေပြီဟု ဆရာလုပ်သည်၊ စိတ်ဓါတ်တွေကျဉ်းမြောင်းနေပြီ၊ လူမျိုးစွဲတွေ၊ ဗမာဆန့်ကျင်ရေးစိတ်တွေဝင်နေပြီဟု တဖက်သတ်ကောက်ချက်ချသည်။ ကရင်နီလူငယ်များ ဗိုလ်ချုပ်အောင် ဆန်းရုပ်တုကိုရန်မရှာနဲ့ တရားခံကိုမြင်အောင်ကြည့် ဟုဆရာလုပ်သည်။

          ဆိုးလှပေတကား အနှီစာရေးဆရာသည် အဆိုပါဆန္ဒပြမှုကိုဦးဆောင်ခဲ့သည့် လူငယ်များကို ဖမ်းဆီး သောကြောင့် ရန်ကုန်မြို့တော်ခန်းမရှေ့တွင် ဆန္ဒပြခဲ့သည့်အတွက် ကျောက်တံတားမြို့နယ်တရားရုံးတွင် တရား စွဲဆိုခံခဲ့ရသည့် လူငယ်များလောက် လူမျိုးတစ်မျိုးနှင့်ပြည်တပြည်၏ သမိုင်းကိုမသိဟု ကောက်ချက်ချရမည် ဖြစ်သည်။ ယခုစာရေးဆရာသည်ပင်လျှင်တရားခံဖြစ်နေပေပြီ။

          ယခုကယားပြည်ဟုခေါ်နေသည်ပြည်နယ်ကို ယခင်က ကရင်နီပြည်ဟု ခေါ်ဆိုသည်ကိုရော သိမှသိပါ လေစ၊ ကရင်နီပြည်သည် တချိန်ကသီးခြားလွတ်လပ်သည့် ပြည်တစ်ပြည်ဖြစ်ခဲ့သည်ကိုတော့ မသိသည်မှာ သေခြာသည်၊ ထိုသို့မသိသည့်အတွက် မြန်မာ့လွတ်လပ်ရေးဖခင်ဗိုလ်ချုပ်အောင်ဆန်း၏ မြန်မာနိုင်ငံလွတ်လပ် ရေးကြိုးပမ်းမှုသည် ယခုချိန်တွင် မြန်မာနိုင်ငံ၏အဖွဲ့ဝင်ပြည်နယ်ဖြစ်နေသည့် ကယားပြည်နယ်လည်း အကြုံးဝင် သည်ဟု ၀ါလုံးသိမ်းယမ်း၍ ဆန္ဒပြသူများကို နင်ဘဲငဆအပြစ်တင်နေခြင်းဖြစ်သည်၊ ထို့ထက်ပိုဆိုးသည်က ဆန္ဒ ပြလူငယ်များ၏နိုင်ငံရေးအသိအမြင်ကို ၁၉၆၂ အာဏာသိမ်းအခြေအနေတွေကို မသိသယောင်၊ ၁၉၇၄ အခြေခံ ဥပဒေကိုမသိသယောင်၊ ၂၀၀၈ ဖွဲ့စည်းပုံအခြေခံဥပဒေ၏ အားနည်းချက်တွေကို မမြင်သယောင်စွပ်စွဲလိုက်ခြင်း ဖြစ်သည်၊ အဆိုပါလူငယ်များသည် ပြည်နယ်တွင်းရှိလူငယ်များလေးစားအားကျရသည့်လူငယ်များဖြစ်ပြီး တစ်ဦးခြင်းစီတွင် လုံလောက်သည့်နောက်ခံနိုင်ငံရေးဗဟုသုတကိုယ်စီကိုယ်ငရှိသည်သာဖြစ်သည်၊ ထို့ထက်ပို၍ အဆိုပါလူငယ်များသည် စစ်အာဏာရှင်လက်ထက်က အာဇာနည်နေ့ပိတ်ပင်မှုကြားမှ အာဇာနည်ကျောက်တိုင် ကို ရဲရဲဝံ့ဝံ့လွမ်းသူ့ပန်းခွေချခဲ့ကြသူများဖြစ်သည်။

          တချိန်က ကရင်နီပြည်နယ်ဖြစ်ခဲ့သည့် ယခုကယားပြည်နယ်နှင့်ဗိုလ်ချုပ်အောင်ဆန်း၏ သမိုင်းအရ ဆက်စပ်မှုသည် မယ်မယ်ရရထောက်ပြစရာမရှိခဲ့ပါ၊ ၁၉၄၆-ခုနှစ်၊ ဒီဇင်ဘာလတွင် ဗြိတိသျှတို့ထံမှ လွတ်လပ် ရေးအတူတကွယူရန် လွိုင်ကော်မြို့လည် ဓမ္မာရုံတွင် ကရင်နီပြည်လူထုအား စည်းရုံးရေးစကားလာပြောဖူးခြင်း သာရှိပြီး အဆိုပါအခန်းအနားသို့ ကရင်နီခေါင်းဆောင်များပင်မတက်ပါ။

          ကရင်နီပြည်နယ်အနေဖြင့်လည်း လွတ်လပ်ရေးအတွက် အထူးတည်ကြိုးပမ်းရန်မရှိဘဲ မြန်မာပြည် လွတ်လပ်ရေးရခါနီးမှသာ မြန်မာပြည်အတွင်းပူးပေါင်းပါဝင်လိုသည့် ခေါင်းဆောင်တစ်စုနှင့်ဝန်ကြီးချုပ်ဦးနုတို့ လက်ဝါးခြင်းရိုက်ဆောင်ရွက်မှုကြောင့်သာ မြန်မာပြည်အတွင်း ပြည်နယ်တစ်ပြည်နယ်အဖြစ်ပါဝင်လာခဲ့ရခြင်း သာဖြစ်သည်။

          မြန်မာံသမိုင်းဖြစ်ရပ်အမှန်များရေးသားပြုစုရေးအဖွဲ့က ၁၉၉၀-ပြည့်နှစ်၊ ဧပြီလတွင် ထုတ်ပေခဲ့သည့် တိုင်းရင်းသားလူမျိုးများအရေးနှင့် ၁၉၄၇ အခြေခံဥပဒေ၊ ပထမတွဲစာအုပ်၊ စာမျက်နှာ ၂၁၃ တွင် ၁၉၄၆-ခုနှစ်၊ ဒီဇင်ဘာလ ၃၁ ရက်နေ့တွင် တောင်တန်းဒေသများ၏အရေးနှင့်ပါတ်သက်၍ ဖဆပလ၏သဘောထားကိုဖော်ပြ ထားသည့်ကြေညာချက်ကို ဖဆပလအဖွဲ့ကထုတ်ပြန်ကြေညာခဲ့သည် ဖဆပလသည် တောင်တန်းမြေပြန့်ရှိတိုင်း ရင်းသားများနှင့် ချစ်ကြည်ရင်းနှီးစွာ ဆက်ဆံရေးကို တည်ဆောက်သွားမည့်အပြင်ဗြိတိသျှတို့ထံ အောက်ဖော်ပြ ပါအချက်များကိုတောင်းဆိုမည်ဟုဖော်ပြထားသည်။

          (၁) ဗမာတို့နှင့်အတူ ရှမ်း၊ ကချင်၊ ချင်းတို့အားလွတ်လပ်ရေးပေးရန်၊ ကင်းဝန်မင်းကြီးနှင့်ဗြိတိသျှအစိုး ရတို့ချုပ်ဆိုခဲ့သည့်စာချုပ်အတိုင်း ကရင်နီနယ်၏လွတ်လပ်ရေးကိုလည်း အသိအမှတ်ပြုရန်။

          (၃) လွတ်လပ်လာမည့် မြန်မာနိုင်ငံအတွက်အခြေခံဥပဒေရေးဆွဲရာတွင် ကရင်နီအပါအ၀င်တောင် တန်းဒေသများအားလုံး ပြည်ထောင်စုမြန်မာနိုင်ငံအတွင်း ပါဝင်လာနိုင်ရေးအစီအစဉ်များ ထည့်သွင်းထားရန်၊ သို့သော် ထိုသို့ ပါဝင်ရေး၊ မပါဝင်ရေးကို၎င်းနယ်သူနယ်သားများ၏ ဆန္ဒဖြင့်သာဆုံးဖြတ်ရန် ဆိုသည့် အပိုဒ်များ ကိုကြည့်လျှင် ကရင်နီပြည်အနေဖြင့်တချိန်ကလွတ်လပ်သည့်အဆင့်အတန်းရှိခဲ့ခြင်းကို တယ်ဆိုတာ ဖဆပလ ခေါင်းဆောင်များကိုယ်တိုင် အသိအမှတ်ပြုခဲ့သည်ကိုတွေ့မြင်ရမည်ဖြစ်သည်။ ကရင်နီပြည်လွတ်လပ်ခဲ့ခြင်းနှင့် ပါတ်သက်၍ ခိုင်မာသည့်အထောက်အထား များစွာရှိပါသည်၊ လတ်တလော စာအုပ်စင်ရှင်းရာမှတွေ့ရှိ၍ ဖတ်နေသည့် စာအုပ်မှ ကောက်နှုတ်ပြခြင်းသာဖြစ်ပါသည်။

          သို့ဖြစ်လျှင် ကရင်နီပြည်၏သမိုင်းနှင့် ဗိုလ်ချုပ်အောင်ဆန်း ဆက်စပ်ပါတ်သက်ခြင်းမရှိသည်ကိုတွေ့ မြင်ရမည်ဖြစ်ပါသည်။ ဗမာများအတွက် ဗိုလ်ချုပ်အောင်ဆန်းကဲ့သို့သော ခေါင်းဆောင်များရှိသကဲ့သို့ ကရင်နီ အမျိုးသားများအတွက် ကရင်နီပြည်ကိုအုပ်ချုပ်ခဲ့ကြသော စောဖျာများ၊ အမျိုးသားခေါင်းဆောင်များ ရှိပါသည်၊ သမိုင်းအရ ကရင်နီပြည်ကိုအုပ်ချုပ်ခဲ့သည့် ကရင်နီခေါင်းဆောင်များ၏ ရုပ်တုကိုတောင်နေရာချထားခြင်းမရှိ သည့် ကရင်နီပြည်တွင် သမိုင်းအရသက်ဆိုင်ခြင်းမရှိသောကြောင့် ကရင်နီလူငယ်များက ဆန္ဒထုတ်ဖော်ကြခြင်း ဖြစ်ပါသည်။

          ကရင်နီလူငယ်များအနေဖြင့် ဗိုလ်ချုပ်အောင်ဆန်း၏ ပေးဆပ်မှု၊ ကိုယ်ကျိုးစွန့်မှုနှင့် မြန်မာနိုင်ငံ၏ သမိုင်းတွင် စွမ်းစွမ်းတမံဆောင်ရွက်ခဲ့ခြင်းကို အသိအမှတ်မပြုခြင်းမဟုတ်ပါ၊ မြန်မာ့လွတ်လပ်ရေးဖခင်ဟုညွှန်း ဆိုသည့်ဗိုလ်ချုပ်အောင်ဆန်း၏ရုပ်တုကို သမိုင်းအရမသက်ဆိုင်သည့် ကရင်နီမြေပေါ်တွင်စိုက်ထူ၍ ဆန္ဒပြကြ ခြင်းသာဖြစ်ပါသည်။

          ထို့အပြင် မြန်မာပြည်၏လွတ်လပ်ရေးရရှိခြင်းနှင့်ပါတ်သက်၍ မြန်မာသမိုင်းသည် ဗိုလ်ချုပ်အောင်ဆန်း နှင့်မြန်မာ ခေါင်းဆောင်များ၏နိုင်ငံရေးကြိုးပမ်းမှုသမိုင်းကိုသာပုံဖော်ခဲ့ပြီး တိုင်းရင်းသားခေါင်းဆောင်များ၏ အခန်းကဏ္ဍကို မျက်ကွယ်ပြုခဲ့ပါသည်။

          သို့ဖြစ်၍ မိမိတို့ယနေ့ အထူးတလည်ပြောဆိုဆွေးနွေးနေကြသည့် အမျိုးသားတန်းတူရေး၏ အခန်း ကဏ္ဍသည်မေးခွန်းထုတ်စရာဖြစ်လာပါသည်၊ ပြည်မနေရာဒေသအနှံ့ ဗမာခေါင်းဆောင်များနှင့်ပါတ်သက်၍ ရုပ်တုထုလုပ်ထားရှိခြင်း၊ လမ်း၊ တံတားများကို အမည်နာမပညတ်ခြင်းနှင့်ပါတ်သက်၍ ပြောရန်မရှိသော်လည်း တိုင်းရင်းသားပြည်နယ်များတွင် ထိုသို့ပြုလုပ်ခြင်းက အမျိုးသားတန်းတူရေးကို မျက်ကွယ်ပြုရာရောက်ပါသည်၊ မွန်ပြည်နယ်က ချောင်းဆုံတံတားပြဿနာကို သတိပြုမိစေလိုပါသည်။ အလားတူပြဿနာမျိုးကို ကချင်နှင့် ချင်းပြည်နယ်တွင်လည်းဖြစ်ပျက်ခဲ့ပါသည်။

          ကရင်နီလူငယ်များ၏ဆန္ဒပြရသည့် နောက်ထပ်အရေးကြီးသည့် အချက်မှာ အမျိုးသားတန်းတူရေးကို မျက်ကွယ်ပြုသည့်လုပ်ရပ်ကြောင့်ဖြစ်ပါသည်။

          သို့ဖြစ်၍ အထက်ပါ စာကိုရေးသားသူသည် စာရေးဆရာဖြစ်သည်နှင့်အညီ မိမိရေးသည့်စာကို တာဝန် ခံရမည်ဖြစ်သည်၊ မိမိကိုယ်၌ကလူငယ်များ၏ဆန္ဒပြသည့် နောက်ခံအကြောင်းရင်းနှင့် သမိုင်းဆိုင်ရာဖြစ်ရပ်မှန် များကို သေခြာမလေ့လာဘဲ ငါ့စကားနွားရ စာကိုရေးသည့်အပြင်စာအုပ်အဖြစ်ထုတ်ဝေ၍ တနိုင်ငံလုံးဖြန့်ချီခဲ့ သည့်အတွက် ကရင်နီသမိုင်းကိုမသိသည့်စာဖတ်သူများက သမိုင်းအမှန်တရားဖော်ထုတ်ခဲ့ကြသည့် ကရင်နီ လူငယ်များအပေါ် အထင်အမြင်မှားအောင် လှုံ့ဆော်ခဲ့ရာရောက်ပါသည်။

          စာရေးဆရာမည်သည် ပြည်သူတို့၏ နားမျက်စိများဖြစ်သောကြောင့် မိမိမသေခြာသော အကြောင်း အရာများကို မျက်လုံးနှစ်ဘက်ဖြင့်ကြည့်ရန်လိုပါမည်၊ တဘက်သတ်အမြင်ဖြင့်သာ မိမိသဘောကိုရေးသား တင်ပြပါမူ သင်သည် မျက်လုံးတဘက်ဖြင့် စာရေးသူဖြစ်နေပေလိမ့်မည်။

                                                                                      သောသီခို (၀၅-၀၃-၂၀၂၀)

Leave a Reply

Your email address will not be published. Required fields are marked *